SHBA ka ngritur statusin e Brazilit në “aleat të madh jashtë NATO-s”, njoftoi presidenti amerikan Donald Trump përmes një memorandumi të shkurtër, transmeton Anadolu Agency (AA).

Përkufizimi erdhi disa muaj pas vizitës së presidentit të Brazilit, Jair Bolsonaro në Washington, ku fillimisht u ngrit kjo çështje.

Statusi i ri i mundëson Brazilit qasje të favorizuar në armatimin dhe trajnimin ushtarak amerikan ndaj të cilave nuk kanë të drejtë shtetet tjera jashtë aleancës së NATO-s.

Nën administratën e presidentit Trump, statusi i njëjtë deri më tani i është dhënë vetëm Brazilit dhe Arabisë Saudite, përderisa gjithsej 19 shtete, përfshirë Izraelin, Japoninë, Australinë dhe Egjiptin, janë aleatë të mëdhenj jashtë NATO-s.

SHBA dhe Brazili gjithashtu po punojnë për një marrëveshje tregtare dhe po merret në konsideratë caktimi i djalit të presidentit të Brazilit, Eduardo Bolsonaro, si ambasador i ri i Brazilit në Uashington.

Presidenti Bolsonaro, i cili ka një karrierë ushtarake dhe që është i njohur për politikat pro-amerikane, fitoi zgjedhjet presidenciale të vitit të kaluar duke u mbështetur në retorikën e tij të fuqishme ndaj krimit dhe korrupsionit. Në sinkronizim me politikën amerikane, Bolsonaro poashtu ka mbështetur opozitën në Venezuelën fqinje.